„Налепница“ во режија на Георги Унковски ја доби наградата за најдобар краток филм на Бруклин филм фестивал во Њујорк.

Филмот на Унковски ја имаше својата светска премиера на 39-то издание на најголемиот американски фестивал за независен филм „Санденс“, а доби и престижна награда во Словачка.

„Налепница“ е селектиран и ќе биде прикажан на „Palm Springs international Short film Festival 2020” кој ќе се одржи од 16 до 22 јуни.

„Налепница“ кој е во продукција на „Cinema Futura“ е црна комедија, во која главниот лик по неуспешниот обид да ја обнови својата сообраќајна дозвола, тргнува на пат и запаѓа во серија бирократски проблеми.

Главната улога во филмот ја толкува Сашко Коцев, а покрај него настапуваат и Мони Дамевски, Џевдет Јашари, Љупчо Тодоровски – Упа, Соња Стамболџиоска, Димитрија Доксевски, Калина Димитриовска, Анастасија Аневска и Матеј Настевски.

Кинематографер е Наум Доксевски, сценографијата е на Кирил Спасевски, костимите на Роза Трајческа, додека на маската и шминката на главниот лик работеле Снежана Ангеловска и Ирена Сенокозолиоска. Монтажата е на Мартин Иванов, а дизајнот на звук е на Сашко Потер Мицевски.

„Налепница“ е финасиски подржан од Агенцијата за филм на Република Северна Македонија.